Thursday, December 30, 2010

بين الجديد والقديم

يااااااااااه

أخدت جولة داخل البلوج لاقيت تاريخه مش قليل وكان له زوار زمان .... الله يرحم بقي وقول للزمان ارجع يا زمان
زي مايكون كنت بتجول في صفحات عقلي وافكاري القديمه وايه اللي اكتشفته ؟؟؟
ماتضخضوش قوي كده : )
المهم ...... زي مايكون كنت بابص لنفسي بعيون شخص تاني
معظم بوستاتي وقصصي كئيبه بصراحه يعني وضلمه ومطلعه فيها كل مشاعر الالم والحزن والحيره ...اما دلوقتي....... متغيرتش قوي عن زمان لسه كتاباتي حزينة : )
لسه نظرتي للامور معقده زي ماهي بس بشكل انضج ,
وده حقا غريب لان حياتي اتفيرت كتير وافكاري زي ماهي يعني تغير كده في نفس الاتجاه زي لماتضع مؤثر علي تفاعل كميائي فينتقل التفاعل في نفس اتجاه تكون المواد الناتجة فيزيد تركيزها ....يعني نفس الافكار بكمية اكبر وجوده احسن أصل بيني وبينكم الحياة فعلامعقده
هي فكرتها مفهومه بس التنفيذ صعب بمعني انت تعرف الحلال من الحرام وتقدر تعمل الحلال ف الحاجات الكبيره اللي باينه بس في امور كتيرة صغبرة مابناخدش بالنا منها وبنعملها وبتكون حرام
بس اتعودنا عليها لأن الحباة فرضتها علينا وصعب التغيير او الناس بدأت تصدق انها حلال كنوع من
تمشية الامور اوكبر ودماغك عديها دماغنا زكده يعني
وطبعا تبقي مجنون لو غيرت المعتاد
دا غبر كمية القرارات اللي الواخد بيتخذها من اول ماينزل للدنيا
أختار اللعبه دي ولا دي ... البس احمر ولا بنفسجي .... طب ولا صيدله ولا اداب ولا تجارة
اركب العريبة البمبي ولا الليني .... لأ لحظه الإختيار ده مش متوفر لي ده لأبن وزبر النقل
الفيلا في التجمع ولا مدينتي .... لا ده برده لابن وزير الاسكان
والله الحكومة بتتعب عشان تريحنا من اختيارات كتير
كتر خيرهم وياخد من خيرها ويدلهم ....لأ لحظه ده حاصل فعلا
ده غير بعد مأساة التعليم العقيم مافيش وظايف محترمه بالذات للصيادله علي فكره حقنا في الحضيض .. ياتشتغل بياع في البقاله اللي اسمها الصيدله ياما تشتغل برده بياع بس متنقل
كميديكال رب .. وطبعا ذوق الدكاتره معانا مالوش حد بصراحه بيقومولنا من علي الكراسي
والله بس عشان يدونا بال ..... قصدي يقغدونا مكانهم
بس اكيد الصبدلي له دور اكبر من كده والا ماكنش اتعملت كليه مخصوص
اهو شفتم عقد بقي .. يبقي ازاي ماتبقاش معقده
ده غير المسئوليات اللي بتكتر يوم عن يوم كل ما الواحد يكبر
ده غير بقي اني حاسه اننا عايشين حياتنا للأهداف الخطأ

التفاؤل شيء مهم طبعا وبشجعه جدا بس مش لدرجه اننا نغض بصرنا خالص عن المشاكل
المهم نرجع لموضوعنا كنت بقول ايه .... اه

والغريب ان التعليقات بتعتي-ردا علي المعلقين- كانت تتميز بخفة دم لذيذه
من حقي امدح في نفسي شويه انا لسه شتماني من شويه
: ))))
تناقد شوية غريب
ولكن كانت ساعات بتبقي هجوميه وفعلا مازلت كده معلش بقي الكدب مالوش رجلين : )
معني كده ان البني ادم مهما اتغيرت حياته برده هو لسه العقل والافكار والشخصية اللي شب عليها
مافيش حد بيغير من الجذور ممكن شكليات بس الاساس ثابت
كمان فكرتني الجوله بصديقه قديمه
الشريك المؤسس للمدونه سابقا كروان ولأن دوام الحال من المحال .....فتفرقت الاحوال
كانت صداقه مختلفه ومعقده في نفس الوقت الكلمه دي ورايا ورايا
بقدر كل يوم فيها

وبمناسبة دوام الحال روحت ازور المدونات القديمه اللي كنت متعوده ازورها قله قليله منهم مستمر لسه في التدوين ودي
حاجه زعلتني زي مايكون التدوين كان موضة وقدمت
الكتابه دي بالنسبه لي حاجه كده ماتتوصفش زي ماتكون في صندوق ضيق طول حياتك مش علي مقاسك فتلجأ للكتابه فجأه تلاقي نفسك في وسط بحر ممكن تغرق فيه بس مش هامك ...انا وصفت العلاقة بيني وبين الكتابة في إحدى قصصي علي البلوج بجنية البحر الأزرق فعلا انا كده معاها
مقدرش استغني عنها لاني بتألم لما يسيبها وانا متأكده ان كل مدون قديم وبطل بيتألم وبيحس في حاجه ناقصاها بش مش قادر يحدد ايه هي
بس كده انا مابحبش اكتب بالعامي بفضل الفصحى ولكن عقلي مرهق من ان افكر بالفصحى تقبلوا اعتذاري
انا معرفش بكلم مين بس ماعلينا تقبلوه وانتم ساكتين
: )

سنة جديده سعيدة علي الكل
ان شاء الله
والقديم استفد من خطئه واهجر ندمه مع هجرك للسنة واحتفظ بحسنه في قلبك
وتمر الأيااااااااااااااام

فانتازيا سابقا وتوهة حاليا